Naguummong dagiti eco waste coalition groups tapno awagan dagiti amin a deboto a liklikan ken kissayan ti panagpartuat ti basura iti masungad a Traslacion 2025 inton Enero 9.
Pinaregta da dagiti timmabuno a mangitugot kadagiti water bottle a useable ken liklikan ti mangitugot kadagiti single-use plastic water bottles ken dadduma pay a single use plastics a masansan a mangapektar iti aglawlaw.
Kabayatanna, pinaregta met ti pannakabagi ti Metropolitan Manila Development Authority (MMDA) a ni John Marie Caoyong a tumulong iti publiko para iti nadalus a selebrasion ti Hesus na Nazareno.
Impasiguradona pay a naimpusuan a tulongan ti MMDA ti grupo tapno maitandudo ti nadaldalus a selebrasion iti Traslacion 2025.
Idi napan a tawen, nakairekord ti grupo iti 158 trucks ti basura a nabati kalpasan ti piesta, katupag ti 456 metriko tonelada ken nakadkadlaw kadagitoy dagiti plastic bags, wrapper, styrofoam, upos ti sigarilio ken disposable vapes.
Ad-adda pay nga impalagip ti environmental group a daytoy a gannuat ket tapno makatulong a mangsalaknib iti aglawlaw nga inaramid ti Dios Namarsua.
