BR LA UNION – Nakasaganan ti Philippine National Police (PNP) iti ipatungpal na a seguridad para iti kadakkelan a prusisyon ken panagu-ummong dagiti Katoliko a Traslacion inton Enero 9.
Segun kenni Manila Police District spokesperson PMaj. Philip Ines, nasurok kumurang a 15,000 a pulis ti maimuntar iti kangitingitan ti Traslacion.
Daytoy ket malaksid laeng kadagiti PNP personnel nga ideploy ti dadduma nga ahensiya ti gobyerno tapno siguradwen iti seguridad ti publiko ken mantiniren ti kinaurnos iti tengnga ti namnamaen a panagdarup ti dakkel a bilang dagiti deboto iti kangitingitan ti piyesta ni Hesus Nazareno idiay Quiapo.
Innayon pay ti MPD official, mailukat dagiti alternatibo a ruta agsipudta adda ti sumagmamano a nairikep a kalsada tapno ipaayan dalan dagiti ruta para iti prusisyon.
Iti agdama, awan ti namonitor a seryoso a pangta dagiti otoridad iti selebrasyon ti piyesta.
Impaganetget manen ti nasao a police district dagiti maipawil nga arwaten nga itugot iti prusisyon kabilang iti panagimet ti payong, patadem wenno natitirad a banag, paltog, ken maipawil ti agpaputok ti firecrackers ken pyrotechnic devices, dagiti mabu-ong a container kasta metten maipawil ti agsuot ti hoodie jacket ken kallugong maiyannurot iti maipat-patungpal nga ordinansa iti siyudad.
Nabalakadan dagiti deboto a makipaset ti prusisyon a nu saan a maliklikan ti agimet wenno agitugot ti bag ket rumbeng a transparent daytoy, maiparit pay dagiti vendors iti uneg ti controlled areas, nainget a maipawil ti agturong iti nasao nga event a nakainom ti arak wenno nabartek ken nu mabalin ket saanen nga agitugot ti ubing wenno addaan ti sakit.
Maipatungpal ti no fly zone, drone zone ken sail zone iti uneg ti bisinidad ti Quirino Grandstand ken Quiapo church.
