Inyebkas ni sigd a Bayan Muna party-list Representative Carlos Zarate ti panagduaduana maipapan iti plano a mangbangon iti Enhanced Defence Cooperation Agreement (EDCA) site idiay Surigao del Norte, nga impaganetgetna a mabalin a pangta daytoy iti kinasoberano ti Pilipinas .
Sungbat daitoy ni Zarate iti apela ni Surigao del Norte 2nd District Representative Robert Ace Barbers a mangitantandudo iti pannakaibangon ti EDCA site iti masakupanna gapu iti panagbuteng mainaig kadagiti parikut a sangsanguen iti eastern seaboard ti Pilipinas kontra kadagiti smugglers ken ganggannaet a manangraut.
Innayon pay ni Zarate a ti kaadda dagiti ganggannaet a tropa ken pasilidad ti militar iti sidong ti EDCA ket mabalin a mangpakaro iti tension iti rehion ken mangiduron iti Pilipinas a makibiang kadagiti rinnupak nga awan pakainaiganna iti nasional nga interes.
Patien met ti sigud a mammanday-linteg a mas epektibo ti panangpapigsa iti Philippine Coast Guard (PCG) ken panangpasayaat iti military surveillance ngem ti panagpannuray kadagiti ganggannaet a base militar.
Inturong pay ni Zarate ti atension kadagiti nabiit pay a pasamak kas iti pannakaduktal ti submarine drone a mapapati a kukua ti China, ken ti panaglabas ti US Carrier Strike Group iti asideg ti kabaybayan ti Pilipinas, a pagilasinan a kasapulan nga talagan ti pagilian ti bukod ken independiente nga estratehia ti depensa imbes nga agpannuray kadagiti kaalyado.
Innayon pay ti sigud a kongresista a rumbeng nga ipangpangruna ti gobierno ti panangpasayaat iti surveillance infrastructure ken panangbangon iti diplomatic engagement kadagiti kabangibang a pagilian.
Kabayatanna, binabalaw ni Zarate a ti pannakaibangon dagiti foreign military base ket awan ti pagnumaranna kadagiti lokal a komunidad ken masansan a pakaigapuan laeng ti saan a panagpapada ti ekonomia, panagduduma ti komunidad, ken pannakadadael ti aglawlaw.
Inawaganna ti pudno nga independent foreign policy a mangipaganetget iti interes ken kinasoberano ti Pilipinas ngem iti pannakaipangpangruna dagiti foreign military bases.
Agingga ita, addan lima a naituding nga EDCA sites ditoy Pilipinas ken uppat pay a sites ti nainayon idi Abril 2023.
