Inikkat ni Department of Foreign Affairs (DFA) Undersecretary Eduardo de Vega ti danag manipud iti publiko mainaig ti posibilidad ti pannakaaramat dagiti Enhanced Defense Cooperation Agreement (EDCA) sites ditoy Pilipinas iti gyera idiay Middle Eastern Region gapo iti pannakibibiang ti Estados Unidos.
Manipud iti pannakipatang ni Usec. De Vega kenda outgoing Foreign Affairs Sec. Enrique Manalo ken US State Secretary Marco Rubio ket saan met a nadakamat ti pannakausar dagiti base militar para ti tensyon idiay Middle East nupay napagtaripongan iti commitment ti US ken Pilipinas para ti maysa ken maysa.
Kinunada nga adayo la unay iti Pilipinas idiay Iran wenno Israel tapno mairaman dagiti dadduma pay a base militar, partikular dagiti EDCA sites.
Indasig ti opisyal ti panagbomba idiay Qatar, nu sadino ket adda sadiay ti airbase ti Estados Unidos a kaasitgen met a kaarruba iti Iran.
Malaksid iti dayta ket impaganetget pay ni De Vega nga addaan ti napintas a relasyon ti Pilipinas kadagiti dadduma pay a pagilian idiay Middle East.
Kabayatanna, agtultuloy met a mangnamnama ti DFA nga agpanurayen ti ceasefire ti Israel ken Iran babaen ti tulong ti Estados Unidos nu kasta ket magun-oden iti napaot a kinakapia iti rehiyon.
