LA UNION – Iti ekonomiya ti Pilipinas ket maysa kadagiti kapartakan ti panagdur-as na iti intero nga Asya ita a 2024 iti laksid ti sangalubongan a karit kas iti geopolitical tensions.
Daytoy ket kalpasan a nairekord ti 5.2% nga economic growth ti Pilipinas, iti maikatlo a kuwarter ti tawen, rason tapno dumanon iti 5.8%average economic growth iti umuna a 3 a kuwarter.
Naartapan iti ekonomiya ti Pilipinas iti dadduma a pagilian iti Asya a pakairamanan ti Malaysia nga addaan iti 5.2% nga economic growth iti nadakamat a panawen; Indonesia – 5%; uray ti China nga addaan laeng iti 4.8% ken Singapore nga addaan iti 3.8%.
Dagiti kangrunaan a nakatulong iti napartak a panagdur-as ti ekonomiya ti pagilian ket ti napigsa a capital formation ken napartak a government spending.
Segun kenni National Economic and Development Authority (Neda) Secretary Arsenio Balisacan, nangipakita ti naidumduma a kinatalged ti ekonomiya ti pagilian ita a tawen.
Iti gross domestic product (GDP) growth ket dimmur-as iti average a 5.8% para iti umuna a 3 a kuwarter ti 2024.
Daytoy ket laksid ti napasaran ti pagilian a weather-related disturbances wenno disruptions iti intero a tawen kasta met ti napaut a panawen ti tikag gapu iti El Niño phenomenon ken nagsasaruno a napigsa a bagyo iti tengnga ti La Niña.
Iti laksid daytoy, kinuna ni Balisacan a napagtalinaed latta ti growth rate ti pagilian wenno posisyon kas maysa a fastest-growing economies iti Asya.
Kinunana a pammaneknek daytoy iti napinget a panagtrabaho ken dedikasyon dagiti umili ti pagilian ken dagiti polisiya nga ipatpatungpal ti gobiyerno iti laksid dagiti karit.
