LA UNION – Kinumapirma ti pulisya a tuloy ti maisayangkat nga eleksyon pambarangay inton bigat idiay Barangay Capas, Agoo, La Union, ti lugar a nagpapatayan kenni Congressman Eufranio “Franny” Eriguel.
Iti pannakiuman ti Bombo Radyo La Union kenni C/Ins. Alfredo Padilla Jr., OIC ti Agoo Police Station, impaganetgetna a tuloy iti eleksyon sadiay iti laksid ti napasamak a krimen idi rabii kabayatan nga adda iti miting de avance iti kaadduan a botante.
Impanamnama met ti opisyal iti kinatalged dagiti residente ti nasao a barangay gapu ta nayunanda pay iti bilang dagiti pulis a mangimaton ti kinaurnos iti eleksyon.
Immuna iti daytoy, maipagarup a ginundawayan iti saan pay a nabigbig a suspek a paltugan agingga a matay ni Eriguel kabayatan nga agbitbitla daytoy iti sango dagiti tattao.
Dua met manipud iti body guards ti sigud a mammanday-linteg iti natay, kabayatan a walo met ti nasugatan iti napasamak a panangraot dagiti saan pay a nabigbig a suspek.
