LA UNION – Maysa manen a baro ti nailista a natay kalpasan a nalmes iti baybay idiay Brgy. Cabarsican, ili ti Bacnotan, La Union.
Binigbig ti pulisia ti biktima a ni Francis Jonathan Fontanilla, 20-anyos, engineering student ken residente iti Brgy. Sta. Cruz.
Maibasar iti imbestigasion ti pulisia, naamuan a naggiinnawis nga agdigos iti baybay da Fontanilla ken dagiti gagayyemna idi kellaat nga ingguyod ida ti napigsa a dalluyon kaduana ti nabigbig a ni Bea Julaton.
Dagus met nga immarayat dagiti gagayyemda ket intarayda dagiti dua iti ospital ngem naideklara a natay ni Fontanilla.
Immuna iti daytoy, tallo nga ubbing ti pimmusay kalpasan a nalmes iti karayan idiay ili ti Aringay ken Tubao.
