Abanten ti England iti maikapat daytoy a semi-final iti FIFA World Cup™, no sadino sangwen da ti defending champions nga Argentina para iti puesto iti 2026 tournament finals.
Bayat a mapaspasungadan iti semi-final, sinublian ti FIFA iti tallo nga immuna a pannakipaset ti Three Lions iti daytoy a paset ti World Cup.
Russia 2018 – nagleppas iti pannakapaay iti kampanya ti England kalpasan nga abaken ti Croatia, 2-1, iti extra time. Nasapa a nakalamang iti koponan babaen ti free-kick ni Kieran Trippier iti maikalima a minuto, ngem nakabawi ti Croatia iti second half babaen kenni Ivan Perisic sakbay a nailista ni Mario Mandzukic iti game-winning goal iti extra time. Gapu ti daytoy, nalapdan iti tarigagay ti Englan a makasubli iti World Cup final iti umuna a gundaway sipud idi 1966. Nagleppas ti Three Lions iti maikapat a puesto kalpasan a maabak kontra Belgium iti third-place play-off.
Italy 1990 – napaay manen ti England a makastrek iti final kalpasan a maabak kontra West Germany, 4-3, iti penalty shootout kasaruno ti 1-1 a tabla kalpasan iti extra time. Immuna ti West Germany babaen ti na-deflect a free-kick ni Andreas Brehme sakbay a naitabla ni Gary Lineker iti laban. Iti shootout, saan a naiserrek ni Stuart Pearce ken Chris Waddle dagiti penalty-da, a nangited iti pannangabak ti West Germany. Naabak met ti England iti host nga Italy, 2-1, iti third-place play-off.
Iti laeng pannangabak ti England iti World Cup semi-final ket nailista idi 1966 iti bukodda a pagilian. Inabak ti koponon ni Alf Ramsey iti Portugal, 2-1, iti Wembley Stadium iti panangidaulo ni Bobby Charlton a naka-iskor ti dua a goal. Nakakissay laeng ni Eusebio para iti Portugal manipud iti penalty shot iti maudi a paset ti laban. Gapu ti panagballigi, bante ti England iti umuna daytoy a World Cup final idiay Wembley, no sadino inabak daytoy iti West Germany, 4-2, kalpasan ti extra time tapno maiyawid ti Jules Rimet Trophy iti umuna a gundaway. Ti orihinal a tropeo ket nasuktan ti agdama a FIFA World Cup Trophy.
Inton Hulyo 15, maaddaan manen ti gundaway iti England a makaaramid ti pakasaritaan iti World Cup. Kalpasan nga inabakda ti Norway iti quater-finals babaen ti pannangabak iti extra time, nakatuding a sangwen ti koponan ni Thomas Tuchel iti defending champions nga Argentina idiay Atlanta Stadium iti semi-final. Ti agballigi ket agabante iti 2026 FIFA World Cup Final inton Hulyo 19 idiay New York New Jersey Stadium, no sadino sangwen ti aniaman a 2-time champion a France wenno reigning European champions nga Spain.###
