Nagpakdaar ni Senate President Francis “Chiz” Escudero nga ipaarestar dagiti kontratista dagiti kuwestyonable a flood control projects nu saan da manen nga agparang iti Blue Ribbon Committee a nakatuding inton Setyembre 1.
Impaganetget ni Escudero a saan nga agdudua isuna a permaan ti arrest warrant agsipud ta segun iti allagaden ti Senado, mabalin a maipaarestar ti siasinoman a naikkan ti subpoena ngem saan met a simmango iti panagdengngeg. Innayon na pay nga obligasyon dagiti kontratista nga ilawlawag ti parte da kadagiti ghost ken substandard a proyekto.
Kinuna met ni Senador Joel Villanueva nga awan iti dapat a ma-santo ken madusa amin a karaman, senador man wenno kongresista.
Kas panangidasig ket dinakamat na ti proyekto idiay Bulacan a personal a binisita ni Presidente Ferdinand Marcos Junior a kinunana ket nakapauneg met iti National Expenditure Program (NEP) ken saan a naisingit a kas kadagiti nangbabalaw iti daitoy ngem saan a kayat na a satwen nga awanen dagiti insertions iti sabali a paset iti budget.
Iti sabali a bangir ket maragsakan ni Senadora Imee Marcos iti panagkedked ni Batangas 1st District Representative Leandro Leviste iti suhol ni Batangas 1st District Engineer Abelardo Calalo ken innayon nga am-ammo nan iti kongresista manipud pay iti kaubing na.
Naipaulogen ti Senado dagiti uppat a subpoena kadagiti kontratista nga addaan iti balay ken opisina idiay Metro Manila ken kinuna iti Senate Sergeant-at-Arms a ni Mao Aplasca, maiserbi metten dagiti nabatbati pay nga innem a subpoena kadagiti probinsya ti Albay, Sorsogon, Bulacan, Pampanga, ken Benguet.
