Nagpanawagan ni Senate President Francis “Chiz” Escudero a kissayan ti P250.8 billion a pondo para kadagiti flood control projects ti Department of Public Works and Highways manipud iti singasing a P881.3 billion budget inton sumaruno a tawen.
Segun kenni Escudero, rumbeng ipaay iti dakkel a paset ti pondo iti edukasyon, salun-at, ken produksion ti taraon bayat a maur-uray iti panangipatungpal ti ADB-funded flood control master plan.
Dinillaw na met iti sobra la unay a pondo para iti flood control – a nasursurok pay iti P13 billion para kadagiti baro a silid-pagadalan ken P52 billion para iti rangtay kas maibasar iti budget proposal.
Isunga pinaregta na iti Department of Budget and Management nga ammirisen manen iti DPWH budget ken limitaran dagiti flood control projects para kagiti lugar a pudpudno a malaylayos.
Kabayatanna, impaganetget dagiti lider ti Kamara nga isubli iti singasing a 2026 national budget iti DBM tapno urnusen iti alokasion, pakairamanan iti kontrobersial a proyekto.
Nagkari met iti DBM ken DPWH a rebisaren iti singasing.
Iti kangitingitan ti kontrobersiya, nairaman iti nagan ti manmanday-linteg iti Centerways Construction and Development – a maysa kadagiti 15 contractors. Inaklon na a nakaawat isuna ti P30 million a campaign donation manipud kenni Lawrence Lubiano idi 2022, ngem pinaglibakan nga adda pakainaigan na kadagiti operasyon ti kompaniya.###
