Pagdandanagan ita dagiti otoridad ti pannakaarestar ti espiya ti China a Mongolian national a ni Bold-Erdene Boldbaatar ditoy Pilipinas.
Pinasingkedan ti Bureau of Immigration (BI) ti pannakaarestar na idi Pebrero 12, 2026, kasaruno ti joint operation kabinnulig ti Armed Forces of the Philippines ken dadduma pay a law enforcement agencies.
Ti 30-anyos a ni Boldbaatar ket nagturpos sadiay Defense University of Mongolia ken Civil Aviation University of China; addaan isunan iti pakasaritaan ti militar ken kinaagpaysuanan ket naka-imet pay ti jet fighter pilot license manipud People’s Liberation Army Air Force Aviation University.
Adu dagiti mapagduduaan nga aksyon ti gangganaet: nangala isuna kadagiti aerial photographs ti Iba Airport idiay Zambales ken idiay Palauig River area – adayo manipud iti inisyal a panggep na ditoy pagilian nga umay laeng agenroll ken agadal iti panagpatayab ti eroplano.
Segun kenni National Security Adviser Eduardo Año, jet fighter pilot daitoy a Mongolian national babaen ti People’s Liberation Army ti China nga immay nagin-e-enroll ditoy Pilipinas kas aviation student.
Iti agdama ket binigbigen ti Bureau of Immigration isuna kas ‘undesirable alien,’ ken impaganetget nga aniaman a panangilimed a mabalin a mangisagmak ti peggad iti seguridad ti Pilipinas ket nainget a mapagsungbat.
