Impeksa dagiti embahada ti Estados Unidos ken European Union ti pannakaseknanda iti napeggad a maniobra ti China Coast Guard kontra iti barko ti Pilipinas iti asideg ti Escoda Shoal idiay West Philippine Sea.
Iti naisina a palawag, inyebkas ni European Union Ambassador Luc Véron ti alarma gapu iti tignay ti China a manglapped iti panangitulod ti Bureau of Fisheries and Aquatic Resources (BFAR) kadagiti suplay kadagiti mangngalap a Pilipino idiay Escoda Shoal.
Dinungpar ken nagusar dagiti barko ti China Coast Guard (CCG) iti water cannon iti barko ti BFAR a BRP Datu Sanday idi laeng kallabes.
Segun iti Philippine National Security Council, dagiti agresibo ken napeggad a maniobra ti walo a barko ti China ti nangitunda iti pannakadadael ti makina ti BRP Datu Sanday, a nangitunda iti nasapa a pannakapasardeng ti humanitarian operation.
Kabayatanna, kinuna ti China Coast Guard nga illegal a simrek ti Datu Sanday iti teritorio ti China ken intultuloyda nga immasideg kadagiti barkoda iti delikado a wagas isu nga inaramidda dagiti control measures kontra iti daytoy maitunos iti linteg ken regulasionda.
