Napalaos ti ragsak ni Jamil Ruhul Amin Shikdar, Top 6 iti kalkalpas laeng nga Respiratory Therapist Licensure Examination kalpasan ti dua aldaw a panaguray na ti resulta.
Ni Jamil ket STEM-strand idi senior high manipud Saint Louise College ken nagturpos kas cum laude ti kurso a Bachelor of Science in Respiratory Therapy sadiay Lorma Colleges, Ciudad ti San Fernando, La Union.
Kinunana a hilig na talagan iti agbasa aglalo nu adda dagiti manamnama nga eksaminasyon iti klase da.
Kabayatanna, ni Jamil paylaeng ti kaunaan a Respiratory Therapist iti pamilya da, nupay addaan dan ti pakasaritaan ti serbisyo salun-at babaen ti panagbalin a Nurse ti ina na.
Inbinglay na a ti panagadal ti Respiratory Therapy ket nalawa ti masakopan na: karaman kadagiti ad-adalen da ket ti anatomy, physiology, cardiopulmonary system, ken panangmanehar kadagiti mechanical ventilators ken nebulizers dagiti kritikal a pasyente.
Nagpaot ti dua nga aldaw ti eksaminasyon manipud Pebrero 11 agingga 12 ken dagos metlaeng nairuar ti resulta idi aldaw ti puso wenno Valentine’s Day – Pebrero 14.
Uppat a tawen nga kurso ti Bachelor of Science in Respiratory Therapy ket kinuna ni Jamil a ti maudi nga tawen iti karigatan;
Daita a tawen ket sangapulo a bulan iti internship da manipud kadagiti nagduduma nga ospital, pakairamanan ti Lorma Medical Center, Ilocos Training Regional and Medical Center, ken Philippine Heart Center idiay Manila.
Nakadwa na iti internship ti top 10 manipud metlaeng Lorma Colleges a ni Aghia Marina Sayo, nu sadino, 100% ti passing rate para iti batch 2024.
Pinaregta met ni Jamil dagiti agtarigagay a makaturpos ti kurso nga adalen ti pundasyon, nangruna kadagiti fundamental subjects a masansan nga mausar inton madanon ti internship.
Innayon na pay a dapat ket addaan ti maysa nga indibidwal ti kapanunotan a mangidaulo ti resulta ti eksaminasyon.
