BR LA UNION – Saan a ninamnama ti 22-anyos a ni Jade Einstein Dacumos nga ag-Top 4 iti kalkalpas a Forestry Licensure Examination a naisayangkat idi Oktubre 16 agingga 17, 2025.
Ti pannakiuman ti Bombo Radyo La Union ket inbinglay ni Jade a sakbay ti inturpos na a kurso ket nangala nga immuna ti kurso a Bachelor of Science in Agriculture and Biosystems Engineering nga idi agangay ket immakar iti Bachelor of Science in Forestry idiay Don Mariano Marcos Memorial State University – North La Union Campus, Bacnotan, La Union.
Saan a naawanan ti namnama ni Jade ken nagtalek isuna ti bagi na tapnu magun-od ti arapaap.
Nupay narigat ket impasnek na ti nagadal tapno maikkan ti ragsak dagiti nagannak ken maipannakel ti pamilya na.
Naamwan na ti nasayaat a damag idi simmangpet iti balay da manipud talon kadwa dagiti nagannak na.
Iti sabali a bangir, inbinglay ni Jade iti inaramid na a preparasyon sakbay ti eksaminasyon: Insagana na ti agpada a pisikal ken mental a salun-at na, kinabisado na ti asignatura ken konsepto dagiti inadal da.
Malaksid dayta, nangan iti nasustansya a taraon kas dagiti natnateng, imminom iti bitamina, ken impasigurado ti naan-anay nga inana tapnu napigsa ti bagi a mangala ti eksaminasyon.
Innayon ni Jade a ti inturpos na ket saan laeng a basta kurso, ngem maysa a napateg a banag nangruna iti panangtaripatao ti aglawlaw.
Kamaudian ket impaganetget ni Jade Einstein a napateg a nagbalin a paset ken nakatulong kenkuana iti Namarsua, nagannak, pamilya, gagayyem, ken ti review center tapno pumasa ken agballigi iti eksaminasyon.
