Imbatad ti legal counsel ni sigud a Negros Oriental Representative Arnolfo ‘Arnie’ Teves Jr. a posible a mangipila da ti petisyon tapno kiddawen iti korte a mapalubosan isuna a makapiyansa.
Nupay nagtutuon ti sangsangwen a kaso ti sigud a mamanday-linteg kadagiti nagduduma a korte ditoy Pilipinas, mabalin a maikonsidera latta ti panagpiyansa na.
Segun iti abogado na a ni Atty. Ferdinand Topacio, ti panangipila ti ‘petition for bail’ ket mapagsasaritaan itan ti kampo da nangruna ti biang ti legal counsel daitoy.
Sumangsango ni Teves kadagiti kaso nga adda pakainaigan na ti murder, illegal possession of firearms, illegal possession of explosives, ken dadduma pay.
Karaman pay ditoy ti alegasyon ti panagpatay na kenni sigud nga Negros Oriental Governor Roel Degamo idi tawen 2023.
Laksid ti nagtutuon a kaso ket impannakkel met ti legal counsel na iti kinasagana da a depensaan dagiti alegasyon,
Kinuna ni Atty. Topacio nga addaan dan kadagiti maipresentar nga ebidensya iti korte agsipud ta naruay met ti tawen a panagsagana da.
Nakatuding a sumango ni Teves iti Regional Trial Court ti Maynila Branch 51 para ti murder case na ken ditoy a mabasaan ti sigud a mamanday-linteg, nupay maisayangkat laeng daitoy babaen ti online video conference, kas immunan a pinasingkedan ti National Bureau of Investigation.
