Naituding manen ti panagsango ni sigud a Negros Oriental Representative Arnolfo ‘Arnie’ Teves Jr. para ti kabaroan nga arraignment ken pre-trial kadagiti sangsanguen na a kaso.
Naka-schedule ti arraignment ken pre-trial na sadiay Manila Regional Trial Court Branch 12 iti alas-8:30 ti bigat inton umay a Lunes Hunyo 30.
Segun iti impaulog a kasuratan iti korte, babaen kenni presiding Judge Renato Enciso ket imbilin na a maipresenta iti sigud a kongresista iti nasao a panagdengngeg.
Kasaruno daitoy idi maisubmitiren ti National Bureau of Investigation-Cybercrime Division iti Return of Warrant of Arrest sadiay korte, karaman ti panangilawlawag iti pannakaarestar kenni Teves.
Gapo iti daitoy ket namnamaen iti korte a dumar-ay a personal ti sigud a kongresista iti naituding nga hearing kadagiti nakasagmakan na a kaso, pakairamanan ti illegal possession of explosives ken illegal possession of firearms.
Maitudtudo pay ni Teves a direkta nga adda pakainaigan na iti murder wenno ‘mastermind’ ti panangpapatay kenni sigud a Negros Oriental Governor Roel Degamo.
Iti agdama ket agpapaimbag ni Teves manipud iti pannakaiturong na idiay Philippine General Hospital gapo iti nakaro a panagsakit ti tiyan.
Agtalinaed isuna iti kustodiya ti Bureau of Jail Management and Penology sadiay Bicutan, ciudad ti Taguig.
