Pinasingkedan ti legal counsel ni sigud a Negros Oriental Representative Arnolfo ‘Arnie’ Teves Jr. ti saan na a panagdar-ay ti pisikal iti arraignment kadagiti sangsangwen na a kaso.
Nakatuding kuma a dumar-ay ti kongresista para ti panangibasa ti sentensya na a nakaskedyul ita nga aldaw sadiay Manila Regional Trial Court Branch 51 itay 1:30 ti malem.
Sangwen ni Teves ti kaso na mainaig ti pammapatay kenni sigud a Negros Oriental governor Roel Degamo idi tawen 2023 nga isuna ti maitudtudo a ‘mastermind’.
Impasiguro met ti abogado na a ni Atty. Ferdinand Topacio ti panagdar-ay ni Teves babaen ti ‘video conference’ kabayatan ti kaadda na iti pagbaludan.
Iti agdama ket adda latta iti kustodiya ti National Bureau of Investigation ni Teves, partikular sadiay building 14 ti detention facility ti ahensya idiay ciudad ti Muntinlupa. Daitoy ket laksid ti impaulog a commitment order ti Manila Regional Trial Court Branch 12 a maiyakar isuna idiay Manila City Jail.
Gapo iti dayta ket nangisubmitir ti maysa a motion for reconsideration ti korte ti kampo na tapno kiddawen ti saan na a pannakaiyakar gapo kadagiti mapapati a security concerns.
