LA UNION – Tiniliw manen dagiti otoridad iti maysa a sigud a balud ken drug surrenderee, iti naiganwat nga anti-illegal drug operation iti pagtaengan na idiay Barangay Tanqui, San Fernando City, La Union.
Nabigbig ti suspek iti nagan a Gilbert Acosta, adda iti umno nga edad ken addaan ti asawa.
Nagresulta ti operasyon iti pannaka-kumpiskar iti 6 a plastic sachet ti mapapati a shabu ken drug paraphernalia.
Maibasar iti report a nakalap ti Bombo Radyo La Union, ginandat pay ti suspek nga aglibas kalpasan a nagpambar kadagiti otoridad a mapan na kitaen ti ina na a simru iti sakit na.
Nupay kasta, kinamat dagiti otoridad iti suspek ket nakorner da met laeng kalpasan ti 20 a minuto.
Daytoyen ti maikatlo a daras a naibalud ti suspek gaputi agpapada a kaso, nga adda pakainaigan na iti panagikot ti iligal a droga.
Ni Acosta ket adda ita ti custodiya dagiti otoridad.
