BR LA UNION – Inraman ti sigud nga opisyal ti Department of Public Works and Highways (DPWH) da Senators Jinggoy Estrada ken Joel Villanueva a nagnumar iti P955-million a balor ti Bulacan flood control projects ken addaan ti 30 percent nga “SOP” wenno standard operating procedure.
Inbutaktak daytoy ni Engr. Brice Ercison Hernandez, sigud nga assistant district engineer ti DPWH Bulacan iti naisayangkat a panagdengngeg ti House Tri Committee ita nga aldaw.
Kinuna ni Hernandez, nagdesisyon nga agsarita kalpasan a ma-cite in contempt ken inditine ti Senate Blue Ribbon Committee idi Lunes.
Inbutaktak ni Hernandez nga us-usaren dagiti senador ken DPWH officials dagiti district engineers kas “legmen wenno bagmen” para iti infrastructure funds.
Kinanunungan ni Hernandez iti inwaragawag ni Senator Ping Lacson a maus-usar a bagmen dagiti district engineers.
Ninaganan pay ni Hernandez da DPWH Undersecretary Roberto Bernardo ken ti naikkat a DPWH Bulacan First District Engineer Henry Alcantara nga umaw-awat ti pondo wenno iti 30% project kickbacks.
Aganay P355 million a balor ti proyekto ket adda pakainaiganna kenni Estrada kabilang ditoy iti construction of flood mitigating structures with pumping stations and floodgates idiay Barangays Mercado ken Iba idiay Hagonoy nga agbalor ti P60 million each; P45-million project idiay Mambog Creek, Malolos; P50-million project idiay Calero Creek, Malolos; P60-million structure idiay Barangay Meyto, Calumpit; P40-million project idiay Santo Rosario Creek, Malolos; ken P40-million project idiay Barangay Carillo, Hagonoy.
Segun kenni Hernandez, ti sigud a Boss na a ni Engineer Alcantara iti “chief implementer” ken nangimandar iti maysa a DPWH staff nga i-deliver ti cash.
Aganay P600 million a balor ti projects idi 2023 iti pakairam-ramanan met ni Senator Villanueva ken amin dagitoy ket river flood mitigation structures idiay Balagtas ken Bocaue, Bulacan, nga agbalor ti P75 million tunggal maysa.
Iti 30% SOP para kenni Sen. Villanueva ket naidalan kenni Alcantara ken maipagarop a naitulod ti kuwarta iti balay ti senador idiay Bocaue.
