Naitaray iti opsital ni sigud a Negros Oriental Representative Arnolfo ‘Arnie’ Teves Jr. manipud iti kulongan na sadiay ciudad ti Taguig.
Daitoy ket pinasingkedan mismo ti abogado na a ni Atty. Ferdinand Topacio ken inbinglay na a ti sigud a kongresista ket nakapadas ti nakaro a panagsakit ti tyan. Napagammoan nga idi pay kallabes na a marikrikna ti sakit na.
Innayon pay ti abogado a ti kliyente na ket naipaayen met ti first aid ngem saan latta a nagbalin nga umdas tapno maagasan.
Imbutaktak na pay a nagpakaasi ti sigud a kongresista tapno laeng maitaray iti ospital ngem saan met a pinagbigyan dagiti kameng ti pagbaludan gapo iti sursuroten da a protocol.
Impaganetget met ti Bureau of Jail Management and Penology nga inaksyonan da met ti pagkasapulan medikal ni Teves babaen ti jail nurse da.
Iti agdama ket nakadetene isunan idiay Metro Manila District Jail-Annex 2 sadiay Camp Bagong Diwa kalpasan a maiyakar manipud ti emergency room.
Maipalagip a kiniddaw ti kampo ni Teves a a saan a maiyakar ti kustodiya daitoy manipud ti detention facility ti National Bureau of Investigation. Agtalek dagitoy a ti kongresista ket saan nga ordinaryo a balud isu a padanagan da iti seguridad ti biag na.
