LA UNION – Nasarakan a natay iti sigud a miyembro ti grupo nga One Direction a ni Liam Payne.
Segun kadagiti otoridad, maipagarop a natinnag iti 31-anyos a singer iti pagdag-dagusanna a hotel idiay Buenos Aires.
Nakita dagiti tattao sadiay, a natinnag ni Payne manipud iti maikatlo a palapag ti kuwarto na idiay CasaSur Palermo Hotel.
Adda idiay Argentina iti singer para iti Niall Horan concert ita a bulan ken nakatuding koma ti reunion dagiti miyembro ti banda iti nasao a show.
Agtawen ti 16 ni Liam idi nagbalin a parte ti One Direction.
Simmikat ti grupo idi 2010 kalpasan a simmalip dagitoy iti “The X-Factor” ngem nagsisina da idi 2015.
Tawen 2021 idi imbutaktak ni Liam a nakapasar ti addiction iti panaginom ken droga ken namin-adu metten a daras a ginandat na ti agpakamatay.
Agtultuloy ti panang-duktal dagiti otoridad idiay Argentina nu aksidente wenno naigagara ti pannakatinnag ti singer.
