LA UNION – Saan pay a nakaawat ti pormal nga imbitasyon ni sigud a Philippine National Police (PNP) Chief PGen. Oscar Albayalde tapno ipalawag ti nagbalin a papel na iti nadara a drug war ni sigud a President Rodrigo Duterte.
Daytoy ket kasaruno ti panawagan ti agdama a lider ti Philippine National Police a ni PGen. Rommel Marbil nga ilawlawag dagiti sigud a PNP Chief iti nagbalin nga akem da iti kontrobersyal a kampaniya.
Segun kenni Albayalde, awan pay ti naawat na nga opisyal a surat manipud PNP sipud inaramid ni Marbil iti panawagan.
Impaganetget ti heneral a nasay-sayaat nu maipaayan da ti gundaway a mailaw-lawag ti nagbalin a papel da iti napalabas nga adminisrasyon.
Babaen iti nasao a wagas ket maamwan nu siasino iti pudpudno a nanggundaway iti drug war ti napalabas nga administrasyon.
Segun pay kenni Albayalde, sumagmamanon a daras a dimmar-ay iti panagdengngeg ti Quad Committee ti Kamara de Representantes ken sinungbatanna amin a salodsod dagiti mammanday linteg.
Ni Albayalde ket nagserbi a PNP Chief manipud April 2018 agingga October 2019, idi kangitingitan ti kampaniya ni sigud President Duterte iti iligal a droga.
