Naisabit ti nagan ni sigud a PNP Chief Rodolfo Azurin Junior iti kaso ti mapapati a drug haul operations dagiti sumagmamano a heneral ken pulis idi 2022.
Nainaganan ni Azurin gapu ta mapapati nga inted na ti go signal iti drug operations kontra iti maysa a polis ti PNP drug enforcement group (PDEG), a ni Police Master Sergeant Rodolfo Mayo.
Segun kenni DILG Secretary Jonvic Remulla, ti nadakamat a drug bust operation ket paset ti accomplishment report ti PNP ken panangted ti promosion kadagiti nangisayangkat ti operasyon.
Nupay kasta, bassit laeng a porsiento kadagiti nakumpiskarda nga illegal a droga ti naipresenta bayat a nailemmeng ti kaaduan.
Inadmitir ni Remulla nga awanen iti pannakabalinda a mangidarum kenni Azurin iti administratibo gapu ta nagretiro daytoyen idi naiyawat kadakuada ti ebidensia ken naaramid ti imbestigasion.
Inlawlawag ni Remulla nga addata pay laeng ti DOJ a mang-evaluate manen kadagiti ebidensia ken ti posibilidad a mangidarum iti krimen kontra kenni Azurin no kasapulan maibasar iti maipakita ken mapaneknekan dagiti ebidensia.
Mainaig iti daytoy, impanamnama ti national prosecution service a nainget ti panangmonitorda iti aktibidad ken ayan dagiti retirado a heneral ken dadduma pay a pulisya a saanen nga aktibo iti serbisio a karaman iti kaso.
Kinunana nga ur-urayenda pay ti arrest warrant nga inruar ti korte kontra kadagiti dadduma a polis nga aktibo pay laeng wenno agtultuloy nga agserserbi ken karaman iti mapapati a drug haul operation.
