BR LA UNION – Mamati ni Ombudsman Jesus Crispin ‘Boying’ Remulla nga imposible a makapag-lemmeng pay ni sigud nga Ako Bicol Party-list Rep. Zaldy Co iti sabali a pagilian.
Segun kenkuana, saanen a makapag-lemmeng ni Co agsipudta sabali itan ti panawen, a dandani aminen ket naka-online.
Mamati ni Ombudsman Remulla a nalaka laengen a sapolen ni Zaldy Co ken mabalin laengen nga i-report isuna dagiti naka-online.
Impaganetget na a mabalin nga usaren dagiti otoridad ti makunkuna a ‘crowd sourcing’ tapno maamwan ti lokasyon ti sigud a mammanday linteg.
Kalpasan ti pannakaiyetnag iti arrest warrant, kinuna ni Ombudsman Remulla nga isaruno dan a kiddawen ti panangiyisyu ti ‘red notice’ manipud INTERPOL wenno International Criminal Police Organization.
Iti likudan daytoy, siniguro ni Ombudsman Boying Remulla a maipaayan ti proteksyon kay Zaldy Co kontra iti anyaman a panaggandat ti biag na, ingkaso nga agsubli ditoy pagilian.
Maysa ni Zaldy Co kadagiti naidatagan ti nagtutuon a kaso kalpasan a mairaman iti anomalya dagiti flood control projects partikular idiay Naujan, Oriental Mindoro.
Sumangsango ita ti kaso a malversation of public funds through falsification of public documents, graft, ken panagawat ti ‘unwarranted financial’ wenno ‘pecuniary benefits’.
