BR LA UNION – Pinatulodan ti House Justice Committee ti subpoena ni sigud a Sen. Antonio Trillanes IV tapno dumar-ay iti nakatuding a panagdengngeg inton bigat, April 22, 2026.
Maibasar iti linaun ti subpoena, nabilin ti senador nga itugot na iti orihinal wenno certified true copy dagiti dokumento a naglaun kadagiti alegasyon na kontra kenni VP Sara Duterte kas ti saan a mailawlawag a kinabaknang a maipagarop a saan a naikabil iti Statement of Assets, Liabilities, and Net Worth.
Ti panangpadar-ay kenni Trillanes iti nasao a panagdengngeg ket tapno tumestigo isuna seknan iti maipagarop a joint bank accounts da sigud a President Rodrigo Duterte ken anak na a ni VP Sara.
Dagiti nasao nga account ket maipagarop a naglaun iti gasut a milyon wenno sumagmamano a bilyon a pisos a naideposito wenno nai-transfer iti uneg ti sumagmamano a tawen.
Namnamaen nga aggiddan da Trillanes ken dagiti mangibagbagi ti Office of the Ombudsman, Anti-Money Laundering Council, Securities and Exchange Commission, ken ti Bureau of Internal Revenue a sumango iti komite inton bigat, April 22.
