Kiniddaw ti Food and Drug Administration (FDA) iti Department of Health (DOH) ti madagdagos a suspensyon ti nangato a babayadan para ti registration fees ken certifications of product registration dagiti produkto nga adda pakainaigan na ti salun-at.
Daitoy ket kasaruno dagiti reklamo a naawat ti ahensya manipud kadagiti pribado a sektor ken ti naisayangkat nga imbestigasyon iti Kamara de Representantes.
Segun kenni FDA Director General Paolo Teston, kasapulan a maadal manen iti polisiya tapno masiguro a nainkalintegan daitoy ken epektibo.
Maipalagip a napermaan ti nasao nga administrative order idi bulan ti Disyembre napalabas a tawen babaen kenni sigud nga FDA chief Dr. Samuel Zacate, a kellaat laeng a sinukatan ni Teston.
Nu mapermaan ti singasing a suspensyon ket agbalin nga epektibo daitoy ti pito nga aldaw kalpasan a maaprobaran ken agpaut ti agingga 60 nga aldaw malaksid nu maibabawi a sigud daitoy.
Sakbayana ket naipatungpal ti kanayunan a bayad para ti license to operate dagiti kumpanya nga agar-aramid, mangiwarwaras, mangilaklako ti agas, taraon, wenno alikamen pang-medikal. Karaman pay ditoy ti pannakaipaatiddog ti bileg ti product registration manipud innem agingga 12 tawen.
Impaganetget ni Teston, nasken a supotaran ti aniaman a relief ken addang a panangpasayaat ti serbisyo ken proseso ti FDA.
