BR LA UNION – Maysa a Pinay caregiver a nabigbig a ni Leah Mosquera, 49, manipud Negros Occidental, ti pimmusay gapu kadagiti sinagrap na a dunor kalpasan a tamaan ti Iranian missile iti apartment na idiay Rehovot, Israel.
Segun iti Philippine Embassy idiay Israel, ni Leah ket naipasidong iti sumagmamano nga operasyon idiay Shamir Medical Center iti uneg ti sumagmamano a lawas.
Iti pannakatay na ket kinumpirma ti kabsat na a ni Joy, nga agtrabtrabaho met laeng idiay Israel.
Segun iti embahada, maas-asikaso itan iti repatriation ken dadduma pay a kasapolan a tulong para kenni Mosquera.
Linagip ti embahada ni Leah kas nasingpet ken managayat a tao, nga am-ammo dagti gagayyem na kas Ate Leah, ken rambakanna koma iti maika-50 a kasangayna inton Hulyo 29.
Maipalagip a ti nasao nga insidente ket napasamak bayat a kumarkaru ti tensyon iti baetan ti Israel ken Iran, sipud nangrugi iti airstrikes ti Israel kontra Iran idi Hunyo 13.
