Maysa a Filipina nurse practitioner iti sumangsango ita ti nadumaduma a federal charges idiay Estados Unidos kalpasan a naakusaran a mastermind iti nalawa nga healthcare fraud scheme a mapapati a nangallilaw iti Medicare ken TRICARE iti dandani US$1 billion (agarup P51.6 billion).
Nabigbig ti suspek a ni Marizel Yukee, residente ti Las Vegas, a napaulogan ti arrest warrant ti United States District Court para iti Southern District of Texas.
Nakasuan isuna ti conspiracy to commit healthcare fraud ken wire fraud, healthcare fraud, conspiracy to pay and receive illegal kickbacks, ken money laundering.
Segun kadagiti federal prosecutors, target ti operasion dagiti nataengan ken pasyente nga addaan ti kritikal a sakit babaen ti panangipaayda kadagiti saan a kasapulan a wound treatments, a kalpasanna ket isingir kadagiti government health programs.
Nainaig ni Yukee iti operasion ti uppat a wound-care clinics idiay Texas, Nevada, California, ken Hawaii, a sadiay ket maipagarup nga agbaybayad ti ilegal a kickbacks kasukat ti patient referrals.
Maibasar iti imbestigasion, mapapati pay a palsipikado dagiti medical records dagiti pasiente ken nagsingir kadagiti serbisio a saan a kasapulan, bayat a makaaw-awatda ti minilion a doliar a kickbacks.
Segun kadagiti piskal, mapapati a naaramat ti nagun-od a kuarta para kadagiti luho ken nangingina a sanikua, pakairamanan ti maysa a Ferrari supercar nga aggatad ti nasurok US$500,000, alahas a kas iti kuwintas a Bulgari nga aggatad ti US$865,000, maysa a balay idiay Hawaii a mapattapatta a US$1 milion, ken maysa a beach resort project idiay Santa Ana, Cagayan ditoy Pilipinas a dumanon ti US$4.6 milion.
