Kinumpirma ni Consul General Adel Cruz ti Philippine Consulate idiay Estados Unidos a saan a karaman dagiti Filipino immigrants ti insayangkat nga immigration raids ti US federal enforcement.
Daitoy ket kalpasan nga arestaren ti U.S. Immigration and Customs Enforcement (ICE) ti maysa a Filipino immigrant idiay Los Angeles nga inlawlawag ti opisyal ti Pilipinas ket saan a mainaig ti kontrobersyal a raid ti maysa a houseware supplier a nangigubuay ti naranggas a panagprotesta.
Segun kenni Cruz, ti naarestar a Pilipino ti mismo a pagtaengan na, kadwa ti parole officer ket addaan ti napalabas a felony convictions. Dinakamat a saan nga undocumented iti kailian nu di ket maysa a legal immigrant. Gapo iti dayta ket adda ti rasonen a maipadeport isuna kas maibasar ti paglintegan ti Estados Unidos.
Ti sabali a bangir ket nangiwaragawag ti Tanggol Migrante Network, maysa a grupo ti Filipino migrant workers kontra kadagiti nadakamat a raids kas “despicable acts.”
Inballaag met ti Konsulado dagiti Pilipino nga adda sadiay Los Angeles nga agannad ken liklikan dagiti lugar nga adda ti protesta.
