LA UNION – Nakasagana iti tulong ti gobyerno para kadagiti residente a maapektaran ti Bagyo Julian partikular iti extreme Northern Luzon.
Naka-monitor iti National Disaster Risk Reduction and Management Council (NDRRMC) iti garaw ti bagyo a rum-rumwar iti pagilian agturong ti amianan-a-daya a direksyon.
Iti situational report nga inruar ti NDRRMC, adda ti nakasagana a nasurok P1.9 milyon a family food packs, aggatad ti P1.48 bilyon ken dadduma pay a food items nga agbalor ti P276 milyon iti insagana ti Department of Social Welfare and Development (DSWD) ingkaso nga adda iti kellaat a panaglayos wenno anya pay nga insidente a gapwanan ti bagyo Julian.
Adda pay nakasagana a non-food items, agbalor ti P919 milyon, a maipaay kadagiti kangrunaan nga agkasapolan a residente manipud kadagiti apektado a lugar.
Nagsagana pay ti ahensya ti Quick Response Fund (QRF) nga agbalor ti P123 milyon ken standby fund a P171 milyon para iti dadduma pay a kasapolan dagiti nadidigra ti bagyo, nu ag-landfall ditoy Pilipinas ita nga aldaw.
