Nadumaduma a sectoral group ti nangipila ita nga aldaw iti reklamo sadiay Office of the Ombudsman kontra sumagmamano a sigud nga opisiales a karaman kadagiti maanomalya a flood control projects.
Karaman kadagiti nangipila iti reklamo ti Kilusang Bayan Kontra Kurakot ken Bagong Alyansang Makabayan, indarum da da sigud nga Undersecretary Adrian Bersamin ken sigud a Department of Education Undersecretary Trygve Olaivar.
Segun kenni David San Juan ti Kilusang Bayan Kontra Kurakot, ti panggep ti panagipila ket tapno mapagsungbat dagitoy, ken indagadagna iti Ombudsman a sukimaten ti posible a panaglabsing iti Code of Ethics of Public Officials, Anti-Graft and Corrupt Practices Act (Republic Act No. 3019), kasta met ti grave misconduct.
Maysa kadagiti nangibasaran da ti reklamo ket dagiti palawag ni sigud nga Ako Bicol Party-list Representative Zaldy Co ken sigud a Department of Public Works and Highways Undersecretary Roberto Bernardo.
Impaganetget ni Bagong Alyansang Makabayan Chairperson Teddy Casiño a pammaneknek ti nasao nga addang a saan a maliplipatan ti publiko iti isyu ti korapsyon seknan dagiti flood control projects.
Inyunay-unayna a rumbeng nga agimbestigar ken agtignay ti Office of the Ombudsman, gapu ta dagiti mairekreklamo ket adda pakainaiganda iti Malacañang, espesipiko kenni Presidente Ferdinand “Bongbong” Marcos Junior.
