Nakalusoten idiay Senado ti Free Funeral Services Bill para kadagiti marigrigat babaen ti botos a 22 a pimmabor ken awan ti kimmontra ken nag-abstain.
Inisponsoran ni Senadora Imee Marcos ti Senate Bill No. 2965, a pagaammo pay kas Free Funeral Services Act.
Segun iti bill, dagiti marigrigat ket dagiti pamilya a ti biruk da ket nababbaba pay ngem iti poverty threshold ti National Economic and Development Authority (NEDA) wenno saan a kabaelan dagiti kangrunaan a magagatang kas iti taraon, salun-at, edukasyon, balay ken dadduma pay nga intuding ti Republic Act No. 8425 wenno ti Social Reform and Poverty Alleviation Act.
Ti Free Funeral Services ket maipaay kadagiti pamilya nga adda iti crisis situation segun iti intuding ti Department of Social Welfare and Development (DSWD).
Dagiti met kuwalipikado a marigrigat a pamilya ket makaawat ti makuna nga “Indigent Funeral Package,” pakairamanan dagiti sumaganad:
– Panagproseso kadagiti funeral documents
– Embalsamo
– Interment service
– Transportation
– Cremation ken inurnment, coffin, urn, wenno lugar para ti punpon ken seremonya.
Maipaay ti libre a serbisyo ti tunggal panagpusay ti miembro ti pamilya babaen kadagiti accredited funeral establishments sadinoman a paset ti pagilian.
Mabilin amin nga funeral establishments, anya man a klase wenno lokasyon, ket nasken a mangipatungpal ti maysa a standard nga “Indigent Funeral Package” a mausar ti amin a marigrigat a pamilya, kas maiyannurot ti pannakikoordinar ti Department of Social Welfare Development.
