Kasaruno ti naipaulog a warrant of arrest kontra kenni Attorney Harry Roque, kampante ni Criminal Investigation and Detection Group (CIDG) Director Major General Nicolas Torre III a mabirukan tu metlaeng ti paglemlemmengan ti sigud a sekretaryo.
Segun iti nalatak nga heneral, dagos a nangbukel ti CIDG kadagiti tracker team a naideploy tapno sukimaten ni Roque.
Maipalagip a ti CIDG metlaeng ti nangipila ti complaint kontra iti sigud a presidential spokesperson gapo iti pakainaigan na ti human trafficking activities, partikular ti Lucky South 99 – kadakkelan a Philippine Offshore Gaming Operator (POGO) hub iti probinsya ti Pampanga.
Idi Mayo 15 idi impaulog ti warrant ti maysa a local court sadiay Angeles City, Pampanga kontra kenni Roque. Karaman pay ditoy ni Cassandra Li Ong, ken dagiti 49 a dadduma pay nga indibidwal.
Dua a bulan sakbay ti warrant, nagparang ni Roque sadiay The Hague, Netherlands tapno tumulong kuma iti kaso ni sigud a Presidente Rodrigo Duterte nga agdama a nakadetene idiay International Criminal Court.
Kamaudiananna, kinuna ni Roque a nag-apply isuna ti asylum idiay Netherlands gapo ti mapapati a political persecution a maar-aramid kenkuana ditoy Pilipinas.
