Sanguen manen ti Gilas Pilipinas ti Australia Boomers inton damdamda, alas-siete trenta (oras ditoy Pilipinas) para ti FIBA World Cup Asian Qualifiers.
Daytoy ti umuna nga ay-ayam ti Boomers ditoy pagilian sipud idi Hulio 2018, a nakapasamakan ti kontrobersial a laban a nagpatingga iti riribuk ken nagresulta iti adu nga ejections manipud iti agsumbangir a dasig.
Iti dayta a laban, 89-53 ti iskor, a pimmabor iti Australia.
Iti agdama, adda ti Pilipinas iti Group A kadua ti Australia, New Zealand, ken Guam.
Dagiti laeng top three teams iti tunggal grupo ti umabante iti sumaruno a round.
Nakailistan iti Gilas ti dua a pannangabak kontra Guam iti napalabas a window ken manamnama nga agbalin a kritikal iti laban kontra iti Australia ken ti New Zealand para iti kampanyada.###
