Dimmanon ti rekord a US$64 bilion ti eksport ti Pilipinas iti umuna a walo a bulan ti 2026, gapu iti panagdur-as ti industria ti electronics ken semiconductors. Gapu iti daytoy, idurduron ti gobierno ti dakdakkel a panagpuonan iti chip design, engineering ken research. Segun kenni Executive Secretary Ralph Recto, a mangidadaulo iti Semiconductor and Electronics Industry Advisory Council (SEIAC), pammaneknek ti panagdur-as nga in-inut a lumawlawa ti papel ti Pilipinas iti global technology supply chain, manipud iti manufacturing ken assembly agingga iti nangatngato a lebel ti teknolohia.
Maibasar iti Philippine Statistics Authority, dimmanon iti US$9.1 billion ti exports idi laeng Agosto, ti kangatuan iti las-ud ti 35 a tawen. Dagiti Electronics products ti nangbukel iti 68 a porsiento iti daytoy, a katupag ti US$6.2 bilion.
Manipud Enero agingga iti Agosto, limmago ti 26.2 a porsiento ti electronics exports ken dimmanon iti US$37.1 bilion.
Nagtalinaed ti Estados Unidos a kangrunaan a destinasion, a nagangkat iti US$12.3 bilion a gatad dagiti produkto ti Pilipino.
Inngato ti Semiconductor and Electronics Industries in the Philippines Foundation, Inc. (SEIPI) iti 10 porsiyento ti forecast iti panaglago ti electronics exports ita 2026, iti baet ti umad-adu a demand iti artificial intelligence (AI) ken data centers. Karaman kadagiti manamnama a mangparang-ay iti industria ket ti plano ti Toshiba a panangpalawa iti operasionna iti Pilipinas iti sumaruno a tallo a tawen, a manamnama a mangpataud iti 3,000 a panggedan.
Ti baro a roadmap ti industria ket target ti tinawen nga eksport a dumanon iti US$110 bilion agingga inton tawen 2030, kagiddan ti pannakapalawa ti semiconductor assembly, testing, packaging, ken electronics manufacturing services..
Mangnamnama met a mangpataud ti ad-adu a panggedan ti Luzon Economic Corridor ken dagiti planned technology hubs iti nadumaduma a paset ti pagilian, kas paset ti panagregget a mangallukoy kadagiti nangatngato a pateg ti panagpuonan ken mangpalawa kadagiti gundaway para kadagiti mangmangged a Pilipino.
