BR LA UNION – Pinaglibakan ti Pilipinas iti claim ti China a naan-anay dan a naala ti kontrol iti Sandy Cay a maysa a bassit a sandbar idiay Pag-asa Island idiay West Philippine Sea (WPS).
Segun kenni National Security Council Assistant Director General Jonathan Malaya, iti inwaras a damag ti Chinese state media ket awan kinapudno na.
Impaganetget ti ahensiya nga awan ti dokumento wenno kinapudno a mangpaneknek iti ibagbaga ti China Coast Guard a kontrolado dan ti nasao a sandbar.
Immuna nga impadamag ti China state media nga impatungpalda ti maritime control iti Sandy Cay idi katengngaan ti Abril.
Idi napan a lawas, inakusaran ni Chinese coast guard spokesperson Liu Dejun dagiti innem a Pilipino a mapapati a simmanglad iti sandbar laksid dagiti ingkabilda a pakdaar.
Kalpasan daytoy, dagus a nag-deploy ti Pilipinas iti 4 a team ti Inter-Agency Maritime Operation tapno maberipika ti claim ti China.
Ngem idi sumangpet da iti nasao a lugar, awan iti nakita da a presensya ti Chinese forces sadiay ngem adda namonitor da a China Coast Guard ken militia vessels asideg iti lugar.
Segun met kenni Philippine Coast Guard spokesperson for the West Philippine Sea Commodore Jay Tarriela, iti waragawag ti China ket nalawag a kina-ulbod ken maysa a klase ti disinformation.
