LA UNION – Naisayangkat iti groundbreaking ceremony ti National Food Authority (NFA) ita nga aldaw, Pebrero 24, 2026 idiay Barangay Damortis, Santo Tomas, La Union para iti maipasdek nga NFA Modernized Warehouse.
Ti seremonya a naangay itay alas-nuebe ti bigat ket paset iti panangpadur-as ti imprastraktura para iti sektor ti agrikultura. Tinabunuan daytoy dagiti opisial ti gobierno, pannakabagi ti nadumaduma nga ahensia, lokal a mannalon, ken maseknan iti sektor ti agrikultura.
Imbinglay ni Hon. Liza R. Balagot, Acting Regional Manager II ti NFA Regional Office I, iti kinapateg dagiti moderno a pasilidad iti pannakapasayaat ti kalidad ti serbisio kadagiti mannalon ken pannakapasayaat ti seguridad ti taraon.
Nangited met ti mensahe da Sto. Tomas Mayor Severino Carbonelle, La Union 2nd District Representative Dante Garcia, Department of Agriculture Regional Executive Director Fidel Libao, La Union Governor Mario Eduardo Ortega, ken NFA Finance and Administration Acting Assistant Administrator Joey Pimentel.
Segun ti NFA, karaman kadagiti proyektoda iti mangpasayaat iti serbisio kadagiti lokal a mannalon babaen ti modernisasion dagiti pasilidad kalpasan ti panagapit, karaman ti panangpasayaat kadagiti bodega, drying facilities, ken sistema a mausar iti panagidulin ken panangiggem kadagiti bukel a mangkissay iti pannakapukaw ti produkto gaputi pannakadadael, agneb, ken peste.
Ti baro a pasilidad ket manamnama a mangpadaras iti panaggatang kadagiti naapit a pagay para kadagiti mannalon, a makatulong a mangipasdek iti naannayas a panagayus ti suplay ti bagas iti merkado.
Babaen ti napasayaat a logistics ken storage systems, mapagtalinaed ti NFA iti dakkel a buffer stock nangruna no panawen ti didigra, kalamidad, ken dadduma pay nga emerhensia.
Ti NFA Post Harvest Modernization Plan ket saan laeng a naipamaysa iti imprastruktura no di pay ket iti pannakapasayaat ti intero nga agri-food supply chain, a mangpangato iti kalidad ti produkto, umadu ti pannakagun-od dagiti mannalon kadagiti merkado ken ti matgedan-da.
Kabayatanna, maibilang iti proyekto a maysa kadagiti kapatgan a panggep tapno mapaadu iti produksion ti bagas ken masigurado ti seguridad ti taraon iti Ilocos Region.###
