Nangisayangkat dagiti grupo a buklen dagiti Muslim ti demonstrasyon iti sangwanan ti Korte Suprema tapno ipadanon dagiti reklamo ken panagsuporta da ti maangay a Bangsamoro Parliamentary Elections 2025.
Impaganetget ni Attorney Lanang Ali Junior, miembro ti Parliamento ti Bangsamoro Transition Authority a nasken a matuloy ti eleksyon a nakatuding a maangay inton bulan ti Oktubre.
Kinunana ket suportado da iti eleksyon nu kasta ket mangngegan met ti boses dagiti umili a sakopen ti Bangsamoro Autonomous Region in Muslim Mindanao.
Kabayatanna, kasaruno daitoy ket ti panangipila da iti petisyon tapno kariten nu maiyannurot metlaeng iti Konstitusyon ti linteg a Bangsamoro Autonomy Act No. 77 wenno ti Bangsamoro Parliamentary Redistricting Act of 2025 a segun kenni Attorney Lanang ket maysa a klase ti ‘gerrymandering’ wenno napagkakadwa a distrito wenno munisipyo a pumabor iti interes dagiti manmano.