Sumagmamano nga indibidual a pakairamanan dagiti mangngalap ti nangipila iti petision idiay Korte Suprema tapno kiddawen ti pannakabaliktad ti desision mainaig iti commercial fishing kadagiti municipal waters.
Dagiti babassit a mangngalap iti sidong ti KKAMPi wenno Katipunan ng mga Kilusan ng Artisanong Mangingisda sa Pilipinas, ken dadduma pay nga environmental groups ti nangawag a saan a palubosan ti panagkalap babaen kadagiti commercial fishing vessel kadagiti kosta nga addaan iti kaadayo a 15 kilometro manipud iti takdang.
Kinunada a ti immun-una a desision ti Korte Suprema a mangipalubos iti commercial fishing iti kastoy a kaasideg ket saan a panangikonsiderar iti pagimbagan dagiti babassit a mangngalap, nangruna ta adda dagiti immun-una a nairekord nga insidente ti pannakadadael dagiti bahura ken dagiti itlog wenno babassit nga ikan tapno laeng umadu ti makalapda.
Makuna pay a maikontra daytoy kadagiti proyekto ken programa ti gobierno a pannakasalaknib ti kabaybayan ti pagilian kas iti pannakaibangon ti Fisheries Management Areas, Coastal Resource Management (CRM), ken Fisheries and Coastal Resiliency (FishCoRe) project.
Saan pay daitoy nga umanamong iti katulagan iti nabiit pay a naileppas a National Plan of Action for Small-Scale Fisheries.
