LA UNION – Inpakaammo ti Philippine National Police a maipatungpal ti gun ban kabayatan ti maikatlo nga State of the Nation Address (SONA) ni Presidente Ferdinand Marcos Jr.
Iti daytoy nta aktibidad ket masuspenso ti amin a permit to carry firearms outside of residence (PTCFOR) inton Hulio 22 kas paset ti security measures para iti State of the Nation Address ni Pres. Marcos tapno masigurado ti kinatalged ti publiko kabayatan ti kangitingitan ti aktibidad.
Epektibo ti gun ban manipud alas 12:01 ti bigat agingga alas 11:59 ti rabii inton Hulio 22.
Maipalagip nga immunan a pinasingkedan ni Philippine National Police spokesperson Col. Jean Fajardo nga ipamaysa ti pulisya ti panagbantay ti Batasang Pambansa Complex gapu ta ti opisina ti Kamara, ti Sergeant at Arms ken ti Presidential Security Group ti mangimatmaton iti seguridad iti uneg ti Kongreso.
Kabayatanna, manamnama a 22,000 a polis ti maideploy inton kaaldawan ti State of the Nation Address, 6,000 kadagitoy ti maidestino iti asideg ti Batasang Pambansa Complex a pakaangayan ti town report ni Pres. Marcos.
