Ad-adalenen ita ti kampo ti Hamas ti inlatag a plano ti Estados Unidos para ti ceasefire deal idiay Gaza.
Daitoy ket laksid ti immuna a waragawag ti senior official ti Hamas a napaay ti panggaep ti Estados Unidos a sungbatan dagiti kangrunaan a pagayatan da.
Sakbayna ket inyanunsyo ti White House a nagpirman iti Israel iti inlatag a plano ni United States Special Envoy to the Middle East Steve Witkoff ken maur-uray lattan ti pormal a sungbat iti biang Hamas.
Maibasar kadagiti opisyales ti Israel, namnamaen da nga iti las-ud ti 60-day ceasefire deal ket mai-turnover ti Hamas dagiti sangapulo a nabiag a kautibo ken bangkay dagiti 18 a kautibo para ti maikadua a paset ti prisoner swap ken panangpawaya-waya kadagiti Palestino manipud kadagiti pagbaludan ti Israel.
Maipalagip a nangipatungpal ti Israel iti total blockade sadiay Gaza ken intultuloy da pay ti opensiba militar da idi Marso 18 kalpasan ti dua a bulan a ceasefire a trinabaho ti Estados Unidos, Qatar, ken Egypt.
Maibasar met ti health ministry a patpatarayen iti Hamas, dumanonen ti agingga 4K a tattao ti natay idiay Gaza kadagiti napalabas a sangapulo a lawas.
