BR LA UNION – Winaya-wayaanen ti Hamas dagiti uppat a kawtibo a babbae a suldado nga Israeli kasukat ti 200 Palestinian a balud, maiyannurot iti ceasefire agreement a manggibus iti 15 a bulan a gubat idiay Gaza.
Dagiti naruk-atan a suldado met isuda Karina Ariev, Daniella Gilboa, Naama Levy ken Liri Albag.
Dagiti uppat ke sigud a nakadestino iti maysa nga observation post idiay Gaza ken dinukot dagiti Hamas fighters idi rimmaut ti grupo idiay Israel idi October 7, 2023.
Segun iti militar, kadwa itan ti bukod da a pamilya dagiti nasao a suldado.
Sakbay na ket naiturong dagitoy iti ospital idiay central Israel, segun iti Israeli Health Ministry.
Kabayatanna, naglugan met iti bus dagiti Palestinian prisoners a rimuar idiay Israeli Ofer military prison kalpasan a naruk-atan dagiti hostage.
Segun iti Prison Service ti Israel, aganay 200 a balud iti nawaya-wayaan.
Kabilang ditoy dagiti convicted militants a mangiserserbi ti tungpal biag a sentensiya gapu iti pannakairaman da iti panagraut ken panagpatay iti dose-dosena a tattao, segun iti Hamas.
Nasurok-kumurang a 70 iti nai-deport idiay Egypt, 16 ti naipatulod idiay Gaza idinto a dagiti nabatbati a bilang dagiti balud ket mairwar da idiay West Bank, segun kadagiti Palestenian officials.
