LA UNION – Inyanunsiyo ti Department of Science and Technology – Philippine Atmospheric, Geophysical and Astronomical Services Administration wenno DOST_PAGASA nga opisyalen a simrek ti panawen ti panagla-lammin, wenno northeast monsoon wenno “Amihan season” ditoy Pilipinas, ita nga aldaw, Nobyembre 19, 2024.
Inlawlawag ti PAGASA, iti panagrugi ti Amihan ket senyales nga in-inuten a marikna ti nalam-ek a temperatura wenno nalammiis a palayupoy ti angin iti kaadwan a paset ti pagilian.
Iti Amihan ket nalammiis nga angin nga aggapo idiay China ken Siberia, a mangipaay ti nababa a temperatura, gaputi pannaka-runaw ti niyebe kadagiti nasao a lugar.
Bumaba metten ti bilang ti bagyo iti kastoy a panawen, ngem nu adda man ti mabukel ket possible a napigpigsa kumpara iti gagangay a bulan.
Imbaga ti PAGASA, iti naglabas nga aldaw ket pimmigsa iti “high pressure area” idiay Siberia, a nanggubway ti strong surge ti northeasterly winds, a namnamaen a mangapektar iti amianan a paset ti Luzon, mangrugi ita nga aldaw ti Martes.
Namnamaen pay nga iti sumaganad nga aldaw, iti panagngato ti northeasterly winds iti sumaruno a dua a lawas, mangigubway ti panagngato ti atmospheric pressure ken panag-lammiis iti surface air temperature iti amianan a paset ti Luzon.
Inlawlawag pay iti state weather bureau, a naitantan iti panagrugi ti Amihan gapu kadagiti nagsasaruno a simrek a bagyo iti umamianan a paset ti pagilian.
Maipalagip a ti onset ti Northeast Monsoon idi napalabas a tawen ket naideklara iti bulan ti Oktubre.
