BR LA UNION – Naibalud iti maysa a head coach a makipas-paset iti Batang Pinoy 2025 idiay General Santos City kalpasan a naireklamo iti kaso nga Act of Lasciviousness in relation to Republic Act 7610.
Nabigbig iti naaresto a coach a 43 anyos, maestro ken maipagarop a head coach ti women volleyball team manipud iti delegasyon ti La Union partikular ditoy siyudad ti San Fernando.
Ti biktima ket 17-anyos nga atleta.
Maibasar iti report ti Bombo Radyo GenSan, napasamak ti insidente bayat a mat-maturog ti delegasyon iti billeting area dagitoy.
Maibasar iti statement ti biktima, agarop ala 1:00 ti parbangon, nakariing daytoy gaputi maipagarop a panangikkat ti boxer shorts ken panangarikap ti suspek iti pribado a paset ti bagi na.
Maibasar pay iti report, maysa met laeng nga atleta a kadwa ti biktima iti maipagarop a nakakita ti inaramid ti suspek.
Saan pay a nalawag nu ti nasao nga atleta ket manipud iti sabali a probinsiya.
Nagreport ti biktima kadagiti otoridad ket dagus met a rinespondian da daytoy, a nakatiliwan ti suspek.
Mainaig ti daytoy, silulukat ti Bombo Radyo La Union para iti maseknan nga opisina ti DepEd partikular ditoy siyudad ti San Fernando tapno malawlawagan ti nasao a report.
