BR LA UNION – Naikkat iti puwesto ni Police Col. Reydante Endonila Ariza kas Ormoc City police director gapu iti maipagarop a pakainaiganna iti pammaltog kenni Albuera, Leyte mayoral candidate Kerwin Espinosa.
Daytoy iti kinumpirma ita ni Police Col. Dionisio Apas Jr., agdama a Leyte Police provincial director.
Agserbi nga officer-in-charge iti Ormoc City Police Office iti deputy regional director for operations a ni Police Col. Dennis Jose Llavore.
Segun kenni Apas, agtalinaed a person of interest ni Ariza iti paqmmaltog kenni Espinosa, a self-confessed drug lord.
Maipalagip nga idi kalman, nadetermina ken naipasidong iti kustodiya ti Philippine National Police idiay Albuera, Leyte dagiti pito a persons of interest, nga agpapada a pulis idiay Ormoc City, a maipagarop nga adda pakainaigan iti napasamak a pammaltog kenni Espinosa.
Napasamak ti pammaltog idi malem ti Huwebes, Abril 10, bayat iti panagkampanya ti grupo ni Espinosa idiay Barangay Tinag-an, Albuera, Leyte.
Nagsagaba ti maysa a tama ti bala ti paltog iti kannawan nga abaga na idinto a nadaplisan iti running mate ken ub-ubing a kabsat na a ni Mariel Espinosa Marinay agraman ti ubing a babai a kaannakanna. Naiturong dagitoy iti ospital ngem dagus da met laeng a nakarwar.
Segun kenni PRO 8 public information office chief Police Major Analiza Armeza, dagus a nangisayangkat ti hot pursuit operation iti Albuera Municipal Police Station kadwa da ti SWAT kontra iti suspek.
Iti panangsurot dagiti otoridad ti maipagarop a gunman wenno sniper, nakita da a simrek daytoy iti maysa a residential compound ken nakita pay dagiti otoridad iti nasao a lugar dagiti pito a pulis ti Ormoc a pakaibilangan ti dua nga opisyal ken 5 a noncommissioned officers ken nakasuot dagitoy ti sibilyan.
Iti met presscon iti Philippine National Police headquarters idiay Quezon City, imbaga ni PNP spokesperson Police Brig. Gen. Jean Fajardo, nga under investigation dagiti nasao a pulis tapno amwen ti pakainaigan dagitoy iti pannakaltog ni Espinosa.
