BR LA UNION – Maysan a bangkay idi masarakan dagiti rescuers iti 17-anyos a barito, iti karayan a sakopen ti Barangay Duplas, San Juan, La Union.
Iti pannakiuman ti Bombo Radyo La Union kenni PMAJ Lawrence Ganuelas, agdama nga information officer iti La Union Police Provincial Office (LUPPO), kinuna na a maibasar iti imbestigasyon ti San Juan Police Station, iti biktima ken dagiti classmates na ket napan da nagdidigos iti karayan partikular idiay San Juan idi malem ti Domingo, Hulyo 6.
Ngem gapu iti napigsa nga ayus ti danum iti karayan ket naiyanod ken nalmes daytoy.
Segun kenni Major Ganuelas a maibasar iti salaysay dagiti kakadwa ti biktima, ginandat da nga isalbar ti gayyem da, ngem napaay dagitoy gaputi delikado a kondisyon iti karayan.
Dagus da a kimmiddaw ti tulong manipud kadagiti asideg a residente ken dagus met nga impakaammo dagiti barangay officials iti San Juan Police Station.
Nangisayangkat ti search and rescue operation ti San Juan PNP kadwa da ti Phil. CoastGuard, San Juan-BFP, MDRRMO, ken dagiti maseknan a residente ti nasao a lugar.
Iti biktima ket managan John Mark Preposi, high school student, ken residente ti Barangay Mameltac, City of San Fernando, La Union.
Kabayatanna, nangipaay manen ti balakad ti LUPPO kadagiti umili a liklikan pay laeng ti agturong ken agdigos iti karayan nangruna iti tiyempo ti panagtutudo.
