Maysa a buy-bust operation ti insayangkat dagiti nagbinnulig a kameng ti Philippine Drug Enforcement Agency Regional Office I – Regional Special Enforcement Team (PDEA RO I – RSET), ken La Union Police Provincial Office – Provincial Drug Enforcement Unit (LUPPO-PDEU) ti nangigubuay ti pannakaarestar ti high-value target drug personality iti uneg ti maysa nga apartelle ditoy Ciudad ti San Fernando, La Union.
Binigbig ni PDEA RO 1 Regional Director, Director III Joel B Plaza ti suspek kas alias Julz, 30-anyos, residente ti San Esteban, Ilocos Sur, mangngged kas bouncer iti maysa a bar ditoy ciudad.
Naarestar isuna ti agarop alas-3:13 ti malem idi Abril 9, agdama a tawen.
Nakumpiskar manipud iti operasyon dagiti dua a pidaso ti heat-sealed transparent plastic sachet a naglaon ti shabu, agdagsen ti sumurok-kumurang 1.5 a gramo nga aggatad ti P10,200.
Malaksid iti droga, nakumpiskar pay dagiti non-drug evidences kas iti mobile phone, rolled foil, dua pidaso ti nausar a foil, dua a lighters, ken ti buy-bust money.
Mapilaan ni alias Julz ti panaglabsing ti Section 5 (Sale of Dangerous Drugs), ken Section 11(Possession of Dangerous Drugs), Article II iti RA 9165 wenno Comprehensive Dangerous Dugs Act of 2002 ken agdama itan a nakadetene sadiay PDEA RO I jail facility, Camp Diego Silang, Carlatan, Ciudad ti San Fernando, La Union. # # #
