BR LA UNION – Arestado ti maysa a high value drug suspect agraman ti gayyem na, iti anti-illegal drug buy-bust operation nga insayangkat ti City of San Fernando City Police Station idi paskua, December 25, 2025, iti nagbaetan ti alas 12:30 ti aldaw agingga alas 3:00 ti malem idiay Brgy. Catbangen, City of San Fernando, La Union.
Ti suspek ket agtawen ti 39, residente ti Brgy. Ilocanos Norte, ken ti kadwa na nga agtawen ti 22, residente ti Brgy. Sevilla, City of San Fernando, La Union.
Nakumpiskar dagiti otoridad manipud iti ikot dagiti suspek ti uppat (4) a heat-sealed transparent plastic sachet ti maatap a shabu, agdagsen ti aganay tallo (3) gramo ken mapatta-patta nga agbalor ti Php 20,400.00.
Karaman pay a nakumpiskar dagiti non-drug evidence kas ti cellular phone, motorsiklo, buy-bust money, ken dadduma pay a drug paraphernalia.
Ti nasao nga operasyon ket naipatungpal maiyannurot ti umiso a proseso ken naidokumento babaen ti suot a camera dagiti otoridad.
Mangipak-pakita ti nasao nga addang iti agtultuloy a commitment dagiti otoridad iti pananglaban ti iligal a droga tapno masiguro ti kinatalged ken seguridad ti kommunidad.
Kadwa ti City of San Fernando City Police Station iti nasao nga operasyon ti Philippine Drug Enforcement Agency Region 1 (PDEA RO1), RID1, RDEU, TSCRMFB1, LUPDEU, LUPIU, PDEG SOU1, 1st LUPMFC, 2nd LUPMFC, ken LUMARPSTA.
