BR LA UNION – Natiliw ti dua a lallaki kalpasan a nakumpiskaran ti mapapati a dried marijuana leaves bayat ti checkpoint operation nga insayangkat ti Naguilian Municipal Police Station (MPS) iti National Highway idiay Barangay Natividad, Naguilian, La Union, iti baetan ti alas 11:20 ti rabii ti Hulyo 30 ken alas 12:10 ti parbangon ti Hulyo 31, 2026.
Maibasar iti report, pinasardeng dagiti pulis ti maysa a motorsiklo a minaneho ti 24-anyos a baro ken backride na nga agtawen ti 25, agpada a residente ti ili a Naguilian, gaputa saan da a nakasuot ti protective helmet ken high-visibility reflective vest, banag a mailabsing iti linteg ti trapiko.
Maibasar pay iti report, sumagmamano a metro sakbay a nakadanon iti checkpoint ket kellaat a nagsardeng ti motorsiklo.
Bayat nga umas-asideg ti maysa a pulis a mangsita koma kadagiti dua, nakitana ti drayber nga adda innala na iti siketna, intinnagna iti daga, ken dagus na a pinayatan.
Gapu iti daytoy, sinukimat dagiti otoridad ti nasao a banag ket natakuatanda ti nakalukat a papel a maipagarop a naglaun ti mapapati a dried marijuana leaves ken fruiting tops.
Mapattapatta nga agdagsen ti tallo a gramo ken addaan ti Standard Drug Price (SDP) a ₱360.
Malaksid iti mapapati nga iligal a droga, kinumpiskar pay dagiti otoridad ti nagluganan a motorsiklo dagiti suspek.
Sumangsango ita dagiti suspek iti kaso a panaglabsing ti Republic Act No. 9165 wenno Comprehensive Dangerous Drugs Act of 2002.
