Nakumpiskar iti maysa nga resurgent drug personality ti shabu ken kalibre .38 a revolver nga addaan pay ti live ammunition babaen ti inyuswat nga search warrant dagiti operatiba manipud Philippine Drug Enforcement Agency – La Union Provincial Office (PDEA-LUPO), San Fernando City Police Station (SFCPS), La Union Police Provincial Office-Provincial Drug Enforcement Unit (LUPPO PDEU), Regional Intelligence Unit-Provincial Intelligence Team (RIU PIT), ken 1st La Union Provincial Mobile Force Company (1st LU PMFC) ditoy Ciudad ti San Fernando, La Union.
Binigbig ni PDEA RO 1 Regional Director, Director III Joel B Plaza iti suspek kas alias Ewoks, 39-anyos, ken residente ti Barangay Poro, Ciudad ti San Fernando, La Union a naarestar ti agarop alas-7:30 ti bigat ita nga aldaw, Abril 7, 2025.
Ti suspek ket addaanen ti arrest record idi pay Abril 2021 ken nawayawayaan babaen ti Plea Bargaining Agreement.
Nakumpiskar kenni alias Ewoks dagiti pito pidaso ti heat-sealed transparent plastic sachet a naglaon ti shabu, agdagsen ti nasurok-kumurang a tallo a gramo ken aggatad ti P20,400.
Malaksid iti droga ket nakumpiskar metlaeng ti kalibre .38 revolver nga addan pay ti innem a bala, bassit a sling bag, dua pidaso ti aluminum foil, maysa a lighter, ken ti black coin purse.
Nalabsing ni alias Ewoks ti Section 11 (Possession of Dangerous Drugs), Section 12 (Possession of Drug Paraphernalia), Article II iti Republic Act 9165 wenno Comprehensive Dangerous Drugs Act of 2002; ken ti Republic Act 10591 wenno Comprehensive Firearm and Ammunition Act kas mainaig iti COMELEC gun ban ken agdama itan a nakadetene sadiay PDEA RO I jail facility idiay Camp Diego Silang, Carlatan, ciudad ti San Fernando, La Union. # # #
